Претстојниов викенд очите на кошаркарските вљубеници ќе бидат вперени во салата во СРЦ „Кале“, каде што ќе се одржи завршницата од Купот „Благоја Георгиевски-Буштир“ во која осумте најдобри екипи ќе ги одмерат силите во борбата за драгоцениот пехар.
Организатор на овој настан е Кошаркарската федерација на Македонија (КФМ), чии предводници решија ширум да ги отворат вратите за спортските фанови, односно влезот на трибините да биде – бесплатен. Улогата на бранител на трофејот ја има тимот на ТФТ, кој лани на сензационален начин дојде до пехарот, додека годинешниве пресметки носат посебен шарм бидејќи носат нова шанса за одвојување на една екипа на врвот од вечната листа победници.