Ограничувањето на цената на руската нафта ги смени приоритетите

Цените на нафтата би можеле да пораснат доколку Москва го намали производството, како што се закани дека ќе направи, нешто што САД и нивните сојузници сакаат да го избегнат.

Американскиот предлог за ограничување на цената на руската нафта требаше да ги намали приходите на Москва за финансирање на војната во Украина. Г7, Европската унија и Австралија воведоа ценовно ограничување, што покажува дека приоритетите малку се промениле, велат аналитичарите.

Од почетокот на неделата, превозниците и осигурителните компании се изложени на санкции доколку пружат услуги за руска нафта која е поскапа од 60 долари, се вели во текстот што го објави агенцијата Ројтерс.

Во исто време, Унијата воведе ембарго на руската нафта испорачана по море.

Цените на нафтата се приближуваат до границата

Преговорите за лимитот траеја долго, бидејќи се сакаше да се избегне скок на цената на нафтата на меѓународните пазари и нарушувања во понудата.

Цените се покачија, па се смени редоследот на приоритетите.

Стана поважно да се задржи руската нафта на пазарот и да се задржат ниските цени на глобалниот пазар, велат извори запознаени со развојот на механизмот за ограничување на цените и аналитичари од енергетскиот сектор.

Нивното мислење е поткрепено со фактот дека пазарните цени на нафтата сега се блиску до границата.

Така руската сурова нафта од марката Урал за испорака во Европа во вторникот се продаваше по просечна цена од 55,97 долари, а во неделата, ден пред воведувањето на лимитот, изнесуваше 61,35 долари.

Како да се ублажат последиците?

Во исто време, аналитичарите сметаат дека ограничувањето на цената нема значително да влијае на приходите на Русија од нафтата толку брзо.

Русија во понеделникот рече дека ограничувањето на цената нема да му наштети на финансирањето на нејзината „специјална воена операција“ во Украина.

Ограничувањето на цената „е несреќен компромис кој нема многу да ги намали приходите од нафта на Русија“ од сегашните нивоа, рече Бен Кејхил, експерт за енергетска безбедност во Центарот за стратешки и меѓународни студии во Вашингтон.

„Мислам дека [предлогот] на американското Министерство за финансии првенствено сакаше да ги ублажи штетните ефекти од забраната за превозот, осигурувањето и услугите што ЕУ ги воведе како дел од санкциите за извозот на руската нафта“, рече Кејхил.

Руски приход како во 2021 година?

Со сегашната граница на цените, Русија би можела да заработува од 10 до 15 милијарди долари месечно од извоз на нафта, проценува Боб Јавгер од канцеларијата на јапонската банка Мизухо во Њујорк.

Горниот крај на опсегот на прогнозата се совпаѓа со заработката од извозот на нафта на Русија во јуни и јули минатата година, пред распоредувањето на руските војници во близина на границата со Украина.

Во јуни, кога цената на барелот на лондонскиот пазар надмина 120 долари, приходите од извозот на Русија надминаа 21 милијарда долари, според проценките на Меѓународната агенција за енергетика.

Во меѓувреме, цените паднаа на 80 долари.

„Санкциите не беа добра идеја“

Но, цената на нафтата би можела повторно да порасне доколку Москва, наместо да ја забрани продажбата на земјите кои го поддржуваат ограничувањето на цената, одлучи да го намали производството, како што веќе се закани.

Во тој случај, САД и нивните сојузници во Г7 би можеле да се најдат во непријатна позиција.

Американските власти „сакаат да го избегнат ова по секоја цена“, тврди Јавгер, а тоа може да значи дека „поддршката за Украина одеднаш може да почне да се намалува“.

„По март, вистинскиот мотив [на американското Министерство за финансии] беше првенствено да ги зачува руските пратки во услови на санкции на ЕУ, кои, според нивното мислење, не беа добра идеја“, рече извор запознаен со дискусиите во администрацијата на Џо Бајден.