За мексиканските новинари, 2022 година е најсмртоносната во историјата

Годинава во Мексико беа убиени 15 новинари и медиумски работници, најмногу во последните 30 години, а непосредната опасност ја потврди и последниот напад врз еден од најистакнатите новинари во земјата.

Двајца вооружени лица на мотоцикли пукаа во оклопното возило на радио и телевизискиот новинар Чиро Гомез Лејва, на околу 200 метри од неговиот дом во четвртокот навечер. Новинарот го опиша нападот и објави фотографии од неговото возило на социјалните мрежи.

Мексиканските новинари солидарно се здружија и отворено го изразуваат своето незадоволство по секое убиство и се спротивставуваат на државниот наратив дека жртвите не се вистински новинари или дека се корумпирани.

Оваа година, меѓу убиените имаше многу репортери од малите градови кои водеа сопствени медиумски куќи, додека некои хонорарци беа убиени во големите градови како Тихуана.

Мексиканскиот комитет за заштита на новинарите објави дека оваа година Мексико е единствената земја со повеќе убиени новинари од Украина.

„Почнавме да собираме податоци за убиствата на новинари во 1992 година, а ова е најголем број убиства на новинари во една година и најсмртоносниот период во власта на мексикански претседател“, се вели во соопштението.

Се додава дека мексиканскиот претседател Андрес Мануел Лопез Обрадор, и за време на кампањата и за време на неговиот мандат, успешно го политизирал новинарството во Мексико повеќе од кога било досега.