Лирој Сане останува во Баерн, отпадна опцијата за трансфер во Барселона

Крилниот напаѓач Лирој Сане ќе остане во Баерн Минхен најмалку уште една година. 27-годишниот фудбалер и неговите агенти одлучија да не бараат други можности во пресрет на новата сезона која започнува многу брзо.

Сане ќе се обиде да најде опции за продолжување на кариерата следното лето, кога ќе има само уште една година од договорот со германскиот шампион.

Претходно беше објавено дека Барселона размислува за трансфер на Сане, кој би можел да го замени Oсман Дембеле. Французинот е пред трансфер во Пари Сен Жермен.

Германскиот репрезентативец игра за Баерн Минхен од летото 2020 година. Досега одигра 133 натпревари на кои забележа 38 гола и 37 асистенции. Поранешниот играч на Шалке 04 и на Манчестер Сити е проценет на повеќе од 65 милиони евра.