Украинците се обидоа да го ликвидираат врховниот командант на Путин за време на тајна посета: Американците им испратија предупредување

Во април, началникот на Генералштабот на руската армија, Валериј Герасимов, наводно планирал тајно да оди на линијата на фронтот, а американските власти наводно ја предупредиле Украина дека неговото убиство ќе предизвика драматична ескалација на конфликтот.

Украина наводно се обидела да го убие врховниот командант на војската на Путин, генералот Валериј Герасимов за време на неговата тајна посета на бојното поле, и покрај тоа што САД го предупредувале Киев да не го прави тоа, пишува The Sun.

Во април, началникот на Генералштабот на руската армија, 66-годишниот Герасимов, наводно планирал тајно патување на фронтот. Како што пишува Њујорк Тајмс, американските власти ја предупредија Украина дека убиството на Герасимов може да предизвика драматична ескалација на конфликтот. Иако во Вашингтон јасно кажаа дека се подготвени да и помогнат на Украина, тие не сакаа да предизвикаат војна меѓу САД и Русија.

„Им рековме дека ќе биде премногу“

По проверка во Белата куќа, високи американски претставници побараа од Украинците да ја прекинат акцијата.

„Им рековме да не го прават тоа, би било премногу“, изјави неименуван висок американски функционер за Њујорк Тајмс.

Но, украинските воени претставници тогаш изјавија дека нападот врз генералот Герасимов веќе бил започнат. Во нападот загинаа неколку десетици руски војници, но не и тој. Неофицијален руски извор изјави дека Герасимов бил ранет во нападот што наводно се случил во Изјум. И функционерот на украинската влада Антон Герашченко тогаш тврдеше дека „многу високи руски офицери биле убиени“ во нападот. После тоа, руските воени лидери наводно ги намалиле посетите на бојното поле. Сето ова се случи откако руските генерали наводно разговарале за употреба на тактичко нуклеарно оружје во Украина.

Досега најмалку 14 руски генерали се убиени на бојното поле во Украина од почетокот на инвазијата. Според американските власти, Русија почнала да ги преместува своите највисоки генерали во првите линии за да ја зајакне одбраната и да го зајакне моралот на војниците кои се борат таму.