Како да му кажете збогум на пријател? Три начини на кои можете да го прекинете пријателството кое веќе не ви одговара

Секоја фаза од нашиот живот носи нови околности, нови ситуации, нови предизвици, па дури и нови луѓе, а понекогаш е неопходно да се прекинат некои претходно блиски врски. Се менуваме и сосема е нормално да чувствуваме заситеност со некоја личност или губење на компатибилноста.

Кога ќе решиме да прекинеме некои пријателски врски, тешко е да најдеме адекватен начин да му го соопштиме ова на нашиот поранешен пријател и да го отстраниме од нашите животи, без двете страни да бидат сериозно повредени.

Зборувајте отворено

Соочете се директно со вашиот пријател и кажете му што ви е на ум. Ако се работи за личност за која навистина се грижевте и мислите дека заслужува искрено објаснување и соодветно збогување, признајте ги причините, кажете му дека искрено ја ценевте и почитувавте вашата врска и дека сте благодарни за тоа искуство.

Ваквиот разговор веројатно ќе биде болен и тежок, но многу потешко е да се остави зад себе необјаснета празнина, збунетост и гнев. Ако се работи за токсична врска со некој што ве повредил, разговорот е уште поважен дел од раскинувањето. Ќе се ослободите од непријатните чувства, а личноста можеби ќе научи поука за своите идни врски.

Напишете писмо

Ако не се чувствувате доволно храбри и подготвени за отворен разговор, ставете ги на хартија вашите чувства и причини.

Растојанието што го дозволува индиректната комуникација ќе ви го олесни наоѓањето на вистинските зборови, ќе ве спречи да го кажете она што не сте сакале да го кажете и ќе му даде на примачот на писмото повеќе време да ја обработи вашата одлука.

На овој начин се заштитувате од ненадејни изливи на емоции и потенцијални стресни расправии, а добро осмислениот пишан збор има силен, сериозен и недвосмислен ефект. Електронската порака ќе функционира исто толку добро, само пријателството не го завршувајте со низа телефонски пораки, бидејќи покажувате непочитување и паѓате во замката на непромисленоста и импулсивноста.

Постепено оддалечете се

За некои луѓе однапред знаете дека нема добро да ја прифатат вашата одлука, ќе ја негираат и упорно ќе се вратат во вашиот живот. Најдобрата опција во вакви случаи е постепено да ги намалувате контактите и дружењето, количината на информации што ги споделувате со нив и полека но сигурно на крајот целосно да се дистанцирате.

Вашиот пријател на тој начин постепено ќе се навикнува на помалку време што ќе го поминете во неговиот живот, нема да доживее нагли промени и ќе избегнете ненадејно да ги повредите неговите чувства.