Две години условен затвор и 250.000 евра глоба: познатата француска актерка Изабела Аџани е осудена за даночно затајување

Кривичниот суд во Париз вчера ја осуди познатата француска актерка Изабела Аџани на 2 години условен затвор и парична казна од 250.000 евра за затајување данок и перење пари.

Таа е прогласена за виновна за фиктивно „престојување“ во Португалија за даночни цели во 2016 и 2017 година, како и за пријавување на донација од 2 милиони евра како заем. Префрлила и 120.000 евра преку американска сметка кои не ги пријавила.

Истрагата за даночната измама на Аџани беше отворена во 2016 година, откако нејзиното име се појави во познатите „Панамски документи“, каде беше откриено дека таа има фиктивна компанија на Британските Девствени Острови. Истрагата во оваа прилика не резултираше со плод, но откри други сомнежи.

Се проценува дека со регистрацијата во Португалија затаила данок од 236.000 евра. Нејзините адвокати истакнуваат дека таа била лошо советувана. Таа во исто време беше осудена за два милиони евра префрлени на нејзината сметка во 2013 година од влијателен сенегалски бизнисмен, претседател на Олимпискиот комитет на Сенегал и член на Меѓународниот олимписки комитет, Мамаду Дијагна Ендиај. Според обвинението, станува збор за донација претворена во заем, со која Аџани може да проневери 1,2 милиони евра.

Казната што и е изречена е нешто повисока од онаа што ја бараше државниот обвинител кој бараше година и пол условен затвор, 250.000 евра и две години губење на граѓанските права. Актерката беше обвинета за систематско намалување на даноците од 2013 до 2017 година, со акцент дека како јавна личност треба да даде пример во исполнувањето на обврските.

Два месеци процесот се одвиваше без присуство на Изабела Аџани, а пресудата беше донесена и во нејзино отсуство. Актерката решително ги негираше обвинувањата, а нејзините адвокати за време на одбраната ја истакнаа нејзината добра волја да соработува во текот на процесот. Судот, очигледно, тоа не го зел предвид.