Предновогодишно интервју со Јасмин Алиевски: Го сакам овој период најверојатно затоа што сум зимско дете

Јасмин, во овој период од годината, првото прашање некако само по себе се наметнува, ја чувствуваш ли празничната еуфорија, како ти поминуваат последните денови од 2023 година?
– Празничната еуфорија секако дека ми поминува убаво, со купување на подароци за најблиските, дружење со семејството и пријателите. Се разбира. во убаво расположение, нешто и работно со по некој настап. Едноставно го сакам овој период од годината, најверојатно затоа што сум и зимско дете, роден во овој период.

Што сè оствари во оваа 2023 на музички план и какви планови имаш за 2024 година?
– Ќе кажам дека ми беше успешна годинава. Станав ексклузивец на Гранд Продукција, па одам почесто на интервјуа – како кај нас, така и низ Балканот. Гостувам во ток шоуа, ја извадив мојата прва песна и спот за Гранд. Би рекол дека 2023 проаѓа прилично добро. За планови во новата, би споменал дека ќе промовирам уште една нова песна и спот, сигурен сум дека ќе ве освои на прва. Во секој случај, се надевам на убава година, но здравјето пред сè.

Какви се коментарите за новата песна „Па како буде“?
– Коментарите се сè повеќе позитивни и тоа баш ме радува, публиката ме прифаќа полека, но сигурно и среќен сум поради тоа.

Песната ја промовираше и на речиси сите српски портали и телевизии. Како реагираат Србите на „Па како буде“?
– Да, периодов доста гостував по емисии кај нас и пошироко низ Балканот. Многу пријатно реагираат.

Има ли Македонија доволно медиуми за поддршка на нова музика?
– Па добро, да бидеме реални, кај нас нема многу медиуми за промовирање на музички проекти. Но, во последно време тоа некако како да се менува.

Гостуваше и во Босна. Откриј нѝ некоја ексклузива оттаму.
– Гостував, точно. Интервјуто веќе е објавено, ќе оставам вашите читатели да си го изберат омилениот дел (можеби оној каде што пеам).