Русија: Воената помош од Западот ја турка Молдавија кон катастрофа

„Како што покажува искуството, непромисленото натрупување на една земја со оружје од Западот не ја зголемува нејзината безбедност и суверенитет, туку напротив, ја приближува поблиску до катастрофа“

Воената помош од Западот за Молдавија не придонесува кон безбедноста и суверенитетот на земјата, рече денес рускиот заменик-министер за надворешни работи, Михаил Галузин.

„Како што покажува искуството, непромисленото натрупување на една земја со оружје од Западот не ја зголемува нејзината безбедност и суверенитет, туку напротив, ја приближува поблиску до катастрофа“, изјави Галузин за руската државна новинска агенција РИА.

Галузин рече дека Москва континуирано го повикува Кишињев разумно да ги согледа предлозите од страна на Западот за „зголемување на одбранбената способност“.

„Би сакал уште еднаш да изразам сомнеж дека таквата ‘помош’ од Западот се спроведува во интерес на самата Молдавија“, нагласи тој.

Осврнувајќи се на прашањето за испораките на руска нафта преку Украина, Галузин рече: „Волуменот на нафта преку јужниот крак на нафтоводот Дружба до Унгарија, Словачка и Чешка ќе остане на нивото од оваа година.“

Коментирајќи за решавањето на конфликтот во Карабах, тој рече дека имплементацијата на трилатералните договори меѓу Русија, Ерменија и Азербејџан ќе придонесе за напредок во работата на мировниот договор меѓу Баку и Ереван.

„Особено се надеваме на градуален напредок во областите како што се деблокирање на транспортните и економските врски во регионот, делимитација на границите и решавањето на хуманитарните прашања“, посочи тој.

Ерменија и Азербејџан во септември 2020 година водеа 44-дневна војна за Карабах, територија меѓународно признаена како дел од Азербејџан, и за седум околни региони.

Војната заврши со мировен договор постигнат со посредство на Русија, откако Азербејџан ослободи неколку градови и над 300 помали населени места и селца што беа окупирани од Ерменија речиси 30 години.