Некогаш мрзливоста е добра за здравјето: Ако не сакате да го местите креветот наутро, продолжете така!

Бројни истражувања покажаа дека местењето на креветот наутро е добра навика за менталното здравје. Меѓутоа, кога станува збор за физичкото здравје, се чини дека тоа не е така. Се испостави дека е подобро да го оставите креветот ненаместен, односно да не го ставате ќебето над него откако ќе се разбудите.

Причината се грините. Овие животни, невидливи за око, се причина за алергии и астма. Тие се хранат со мртвите клетки на нашата кожа, а топлата средина ја фаворизира нивната репродукција. Баш како што е во креветот, под прекривките.

За да се ослободите од нив, барем делумно, добра одлука е да оставите неуреден кревет. Така, грините ќе бидат изложени на поладна температура и свеж воздух и ќе умрат. Тоа го докажуваат навиките на нашите баби, кои постелнината ја ставаат на прозор или на тераса за да се проветрува.

Затоа е најдобро да го оставите креветот ненаместен додека не се вратите дома од работа, за да може постелнината да се проветрува. На тој начин ќе се ослободите од барем дел од грините.