Турскиот дефанзивец, под истрага за прикажување симбол на екстремистичка група

УЕФА во средата објави дека отвора истрага за „потенцијално несоодветно однесување“ на турскиот дефанзивец Мерих Демирал, кој постигна два гола во победата од 2-1 над Австрија во осминафиналето во вторникот.

Самиот Демирал објави фотографија на својот X профил на која ги крева рацете за да прослави еден од неговите голови и со рацете го прави знакот на „Сивите волци“, турска екстремно десничарска група.

Сликата е споделена на социјалните мрежи.

„Назначен е „етички и дисциплински истражител“ и ќе следат повеќе информации за ова прашање“, се вели во соопштението на УЕФА.

„Симболот на турските десничарски екстремисти нема место на нашите стадиони“, реагираше Ненси Фезер, германската министерка за внатрешни работи на Х (поранешен Твитер).

„Користењето на евро-фудбалот како платформа за расизам е целосно неприфатливо и УЕФА ќе го истражи случајот и ќе разгледа санкции“, додаде таа.

Турција во сабота во Берлин во четвртфиналето ќе игра против Холандија.