Откриена причината за смртта на поранешниот шкотски премиер

Причината за смртта на поранешниот шкотски премиер Алекс Салмонд е срцев удар. Тој почина во саботата во хотелот „Инекс Олгица“ во Охрид каде учествуваше на второто издание на Форумот за културна дипломатија. За време на ручекот, Салмонд добил удар при што паднал наназад со столицата, а обидите за негова реанимација биле неуспешни, информираат од неговото семејство.

Во соопштението, тие рекоа дека на „застрашувачкиот политичар“ му се восхитувале ширум светот, но дека бил и „вљубен“ семеен човек чие присуство ги водело во нивните „најтемни моменти“.

Во салата на шкотскиот парламент е отворена книга на жалост.

Салмонд во петокот имаше излагање на второто издание на Форумот за културна дипломатија во коорганизација на кабинетот на поранешниот претседател Ѓорѓе Иванов, Меѓународниот центар „Алијанса на цивилизациите“ и Институтот за културна дипломатија од Берлин, а по неговата смрт остатокот од настанот бил откажан.