Божикна пештера на плоштад Македонија – Пренеси ја божиќната радост до секое срце!

Во срцето на градот Скопје, на Плоштад Македонија, е поставена Божикна пештера која ги најаваува Бадник и Божик – Рождеството Христово, најголемиот христијански празник.

Како што соопштуваат од Здружението Бадникови Поворки, тоа е најубавата и најимпозантна Божикна пештера во регионот, која претставува вистинско ремек-дело на уметноста и традицијата.

-Оваа величествена божикна пештера е изработена по идеја на Ангел Мицевски, кој со својата непресушна креативна визија го осмисли целокупниот проект. Реализацијата, пак, е дело на искусниот вајар, Зоран Тошески кој заедно со својата сопруга Македонка, со посебно задоволство ја прифатија идејата за изработка на пештерата, волонтерски посветувајќи се на целиот проект и деноноќно работејќи со огромен труд. Зоран успеа да создаде дело кое на идните генерации ќе им сведочи за љубовта кон Бога, кон доброто и убавото. За пештерата да блесне во сиот сјај, се погрижи Влатко Павловски, кој исто така волонтерски се приклучи кон нашата мисија, стои во соопштението од организаторите. 

Генерален покровител на Божикната пештера, односно на овогодишните Бадникови поворки во Скопје, е градоначалникот на Општина Кисела Вода, Орце Ѓорѓиевски, а поддршка дадоа и Град Скопје, но и сите скопски општини.

-Нивната поддршка на нашата мисија за утврдување на православната традиција, создава автентична празнична атмосфера за сите во центарот на градот. Особено сме им благодарни и на сите наши волонтери и помагатели кои со своето време, труд и ентузијазам ја направија оваа иницијатива возможна. Тие се вистински херои на нашата заедница и дел од најсветлата приказна на оваа празнична сезона, се наведува во соопштението.

Воедно, од Здружението ги покануваат сите граѓани, да ја посетат на плоштадот Македонија Божикната пештера, која, посочуваат, претставува можност за автентично да се подготвиме за празникот на Христовото раѓање.

-Да ги отвориме срцата, да се радуваме со нашите најмили, уживајќи во оваа прекрасна глетка, која ќе ги топли душите на сите посетители. Да ја пренесеме божиќната радост во сечие срце и во секој дом! Ви посакуваме топли празнични моменти и ве очекуваме на Плоштадот Македонија!, порачуваат од Здружението Бадникови поворки. 

The post Божикна пештера на плоштад Македонија – Пренеси ја божиќната радост до секое срце! appeared first on 24info.mk.