(Видео) Дејвис во аут неколку недели

Ентони Дејвис, кошаркарот на Далас Маверикс заработи сериозна повреда и ќе биде надвор од терените на неодредено време.

Дејвис неодамна стана член на Далас Маверикс во блокбастер трејдот што го испрати Лука Дончиќ во Лос Анџелес Лејкерс.

31-годишниот крилен центар, во саботата, блескаше на дебито во новиот клуб. За 31 минута на теренот имаше 26 поени, 16 скока, седум асистенции и три блокади и се повреди.

Токму неговите чести повреди беа главната причина поради која навивачите на Маверикс стравуваа како ќе изгледа ерата со Дејвис во тимот, а тие стравувања се потврдија по нешто повеќе од половина час кошарка.

Првично не се знаеше колку е сериозна повредата, а неколку дена подоцна стигна потврда дека не е добро.

Според НБА инсајдерот Шамс Шаранија, Дејвис ќе пропушти најмалку неколку недели, а потенцијално и до еден месец.

Остануваат уште околу два месеци до крајот на регуларниот дел од сезоната, а тимот на Џејсон Кид моментално е на осмото место во Западната конференција, второ во плеј-ин зоната.