Таравари оди во опозиција: Алијанса на Албанците на Таравари официјално излегува од Владата
Алијанса на Албанците на Таравари официјално излегува од Владата
По состанокот на Алијансата на Албанците, претседателот Арбен Таравари вечерва на прес-конференција изјави дека ја напуштаат владината коалицијата и дека одат во опозиција.
-Денеска Алијанса на Албанците едногласно одлучи да оди во опозиција. Беше состанок на преѕседателите на ограноците, на многу функционери на АА на кој констатиравме дека минатата година со гордост ја донесовме промената во албанскит блок после 20 години и за тоа сме многу горди. Меѓутоа промените што ги ветивме за жал не ги испорачавме. Затоа ние одлучливме да се вратиме кај граѓаните. Да побараме од нив доверба во октомври за локалните избори, рече Таравари.
Според него, има огромно незадовоство посебно кај Албанците како владее ВЛЕН во оваа Влада, посочувајќи на законот за балансерот, за третманот на Албанците во институциите, а за нив е многу битен и европскиот пат на Македонија.
Таравари рече дека тие сега се во оставка и дека ќе заминат од Владата што ќе бидат избрани нови членови и заменици во Владата.
Со ДУИ засега, вели Таравари, нема никаков договор, но имало некаква комуникација. Таравари најави дека и покрај тоа што заминува во опозиција ќе се сретне со премиерот Христијан Мицкоски, но и со лидерот на опозициската СДСМ Венко Филипче.
На состанокот не присуствуваше вицепремиерот Арбен Фетаи, кој според Таравари бил на пат, а еден од пратениците морал да замине кај семејството.
