“Ограничувањата на цената на руската нафта ја чинат Москва 172 милиони долари дневно”

Водечкиот аналитичар на Центарот за истражување на енергија и чист воздух (CREA) Лаури Миливирта изјави дека ограничувањата поставени на цената на руската нафта ја чинат Москва 172 милиони долари дневно, пренесува Блумберг.

Тие изгубени приходи ќе пораснат на 280 милиони долари кога ќе се прошират ограничувањата и на нафтените деривати. „Забраната за увоз и ограничувањето на цената на руската нафта воведени од Европската унија почнаа да функционираат и нивниот ефект е значаен“, рече Миливирта.

CREA порача дека Европската унија треба да изврши дополнителен притисок врз Москва и да ја ограничи цената на барел руска нафта меѓу 25 и 35 долари. Сегашната граница е 60 долари. Овој потег би ги намалил дневните приходи од руската нафта за уште најмалку 100 милиони евра.

„Клучот е да се намали цената на барелот до степен до кој ќе исчезне профитот, кој потоа Кремљ може да го оданочува, и да се воведат ограничувања за остатокот од нафтата и гасот увезени од Русија“, рече Миливирта.

Блумберг наведува дека Москва може да се обиде да стави крај на загубите со самоволно намалување на залихите и со тоа да ја зголеми цената на барел нафта на светските берзи.

Кремљ веќе се закани дека ќе го стори тоа

Рускиот претседател Владимир Путин изјави дека ограничувањето на цената на руската нафта е „незаконско“.

Досега Русија извезла 3,1 милијарди евра сурова нафта по ограничена цена, а најголемиот дел од тие пари ги оданочувал Кремљ.

Повисоките казни за непочитување на меѓународните прописи и санкции кои би вклучиле продажба на танкери би можеле да ги намалат дневните приходи на Русија од фосилни горива за уште 200 милиони долари.