Тајните на Мерилин Монро излегуваат на виделина: Шокантни белешки, скриена бременост и мистерии што Холивуд ги криеше

Редок увид во приватниот свет на Мерилин Монро повторно ја фасцинира светската јавност, откако нова аукција ќе открие досега невидени предмети, рачно напишани белешки, писма и лични записи кои ја прикажуваат ранливата страна на најголемата холивудска икона на 20 век.

Иако поминаа повеќе од шест децении од нејзината смрт, интересот за животот на Мерилин Монро не стивнува. Новата аукција, организирана од Heritage Auctions, ќе понуди облека, накит, поезија, фотографии и интимни белешки кои досега никогаш не биле достапни за јавноста.

Според организаторите, меѓу највредните предмети се документи што даваат увид во нејзините внатрешни борби, стравови и емотивни трауми, вклучувајќи ја болката поради изгубените бремености, анксиозноста и нејзините размислувања за смртта.

„Луѓето и ден-денес ја сакаат и ја обожаваат Мерилин Монро“, изјави Брајан Чејнс за време на претставувањето на колекцијата.

Тој откри дека еден од најемотивните предмети е белешка напишана за време на снимањето на филмот Some Like It Hot, во која Мерилин пишувала дека се чувствува како да „се дави“, непосредно пред сериозен психички колапс што довел до прекин на снимањето.

На истото парче хартија, актерката нацртала фигура потопена во вода, што според Чејнс претставува потресен симбол на нејзината анксиозност и долгогодишните проблеми со менталното здравје.

Зад гламурозната Мерилин Монро стоела Норма Џин – девојче со тешко детство. Нејзината мајка била сместена во институција, а идната холивудска ѕвезда поминала низ 11 згрижувачки семејства и една година во сиропиталиште во Лос Анџелес.

И покрај светската слава, Монро честопати била потценета и недоволно платена. За време на снимањето на „Some Like It Hot“, нејзината колешка Џејн Расел заработувала десетпати повеќе од неа.

Познато било и дека Мерилин имала потешкотии со концентрацијата и меморирањето на репликите. Легендарната сцена во која требала да ја изговори реченицата „It’s me, Sugar“ била повторена десетици пати.

Аукцијата повторно ја отвори и приказната за нејзиниот приватен живот и љубовните врски. Меѓу најкоментираните детали се фотографиите на кои Мерилин е бремена, а кои со години биле чувани во тајност од нејзината блиска пријателка Фрида Хул.

Според сведоштвата, фотографиите биле направени во 1960 година, кога Монро била во брак со Артур Милер, но наводно татко на детето бил францускиот актер Ив Монтан. Набрзо потоа, таа доживеала спонтан абортус, а блиските тврделе дека очајно сакала да стане мајка.

Во текстовите повторно се споменува и нејзината наводна афера со Џон Ф. Кенеди, која со години е една од најконтроверзните приказни од американската политичка и холивудска историја.

Нејзината изведба на „Happy Birthday, Mr. President“ во њујоршкиот Madison Square Garden останува еден од најпознатите моменти во поп културата, а шпекулациите за нивната врска никогаш целосно не престанаа.

Мерилин Монро беше пронајдена мртва во 1962 година во својот стан на 36-годишна возраст. Официјално, причината за смртта беше предозирање со барбитурати, но бројни теории и мистерии околу нејзината смрт опстојуваат до ден-денес.

Новата аукција уште еднаш потсетува дека зад ликот на најголемиот секс симбол на Холивуд стоела жена со длабоки емоционални рани, стравови и живот исполнет со осаменост, притисок и трагедија.