Дешифрирани 200.000 тајни зборови: Што криеле дневниците на таткото на Стивен Хокинг?

Досега непознати семејни документи и шифрирани дневници на таткото на Стивен Хокинг откриваат нови и интимни детали за детството, болеста и приватниот живот на еден од најголемите умови на современото време.

Станува збор за дневници на Френк Хокинг – таткото на славниот физичар и експерт за тропски болести, кој повеќе од шест децении водел лични записи. Голем дел од нив биле напишани во тајна шифра со грчко писмо, а неодамна биле дешифрирани од наградуваниот писател и физичар Греам Фармело, автор на новата официјална биографија за Стивен Хокинг.

Според информациите, Фармело успеал да дешифрира повеќе од 200.000 зборови, кои откриваат непознати детали за животот на Хокинг – од неговото детство, преку борбата со болеста, до неговите бракови и научна кариера.

„Овој дневник првично бил напишан со грчко писмо за да создаде едноставна тајна шифра и да обезбеди поголема приватност“, објаснил Фармело.

Дневниците откриваат и колку тешко таткото на Хокинг се справувал со здравствената состојба на својот син по дијагностицирањето на моторната невронска болест.

„Сметам дека ова со Стивен е бавно и ужасно искуство. Неговиот говор е толку бавен и тешко се разбира, па разговорот е многу мачен. Многу ми е жал за него и ќе направам сè што можам, но не уживам да бидам со него“, напишал Френк Хокинг во еден од записите.

Во септември ќе биде објавена првата официјална биографија одобрена од фондацијата која управува со наследството на Стивен Хокинг. Книгата со наслов „Хокинг“ ќе ја издаде издавачката куќа „Џон Муреј“.

Авторот имал пристап и до досега необјавени писма и дневници на мајката на Хокинг, Изабел, како и до други семејни материјали што со години биле чувани во домот на неговата сестра Мери.

„Беше прекрасно и целосно неочекувано да добијам пристап до овие записи. Тие се непроценлив извор на информации за животот на Стивен Хокинг, особено за неговите најтешки години“, изјавил Фармело.

Во биографијата се опфатени и најтешките моменти од животот на научникот, вклучувајќи ја и 1963 година кога, на само 21-годишна возраст, му била дијагностицирана тешка дегенеративна болест.

Иако лекарите тогаш му давале прогнози дека ќе живее уште само неколку години, Хокинг ги надминал сите очекувања. Наместо тоа, тој стана еден од највлијателните научници во светот, со револуционерни истражувања во областа на космологијата, времето и црните дупки.

Неговата изјава подоцна стана една од најпознатите мисли што ја одразуваат неговата животна борба:

„Животот би бил трагичен ако не беше смешен. Моите очекувања беа сведени на нула кога имав 21 година. Сè оттогаш е само бонус.“

Стивен Хокинг почина во 2018 година на 76-годишна возраст, оставајќи зад себе научно наследство што засекогаш го промени разбирањето на универзумот.