Претставничкиот дом ќе гласа за законот за независност на Порторико

Порториканците би можеле да се приближат еден чекор поблиску до референдум за тоа дали островот треба да стане американска држава, независна држава или да има друг тип на влада откако Претставничкиот дом денеска ќе гласа за нацрт-законот што го опишува тој процес.

Комитетот на Претставничкиот дом во средата го одобри Законот за статус на Порторико, отворајќи го патот за целосно гласање во Претставничкиот дом.

Законот ги поставува условите за одржување референдум, како и трите потенцијални самоуправни статуси на Порторико, независност, целосна државност на САД или суверенитет со слободно здружување со САД.

Порторико, кој има околу 3,3 милиони жители и висока стапка на сиромаштија, стана територија на САД во 1898 година. Активистите со децении се залагаат за поголемо самоопределување, вклучително и државност.

Од 1960-тите до денес, на оваа тема беа одржани шест референдуми, но тие не беа обврзувачки. Само Конгресот на САД може да даде државност.

„По 124 години колонијализам, Порториканците заслужуваат фер, транспарентен и демократски процес за конечно да се реши нивниот статус“, објави на Твитер пратеничката Нидија Веласкез.

Граѓаните на тој карипски остров се Американци, но немаат право да гласаат во Конгресот, не можат да гласаат на претседателски избори, не плаќаат федерален данок на доход за приходите остварени на островот и немаат исти услови за некои федерални програми како и другите граѓани на САД.

Доколку нацрт-законот помине во Претставничкиот дом, ќе му требаат 60 гласа во тесно поделениот Сенат и потпис на демократскиот претседател Џо Бајден за да стане закон.