Бил Гејтс: Подобро да платам за вакцини отколку за патување на Марс
Мултимилијардерот Бил Гејтс изјави дека повеќе би сакал да плати за вакцини отколку за патување на Марс. Тој мисли дека не е добра идеја да се трошат пари за патување на Црвената планета. Тој зборуваше и зошто е предмет на теории на заговор.
Во изјава за BBC, Гејтс објасни зошто мисли така, односно зошто не троши пари за колонизација на други планети, како што прават мултимилијардерите Илон Маск и Џеф Безос.
„Всушност е многу скапо да се оди на Марс. Можете да купите вакцини против сипаници и да спасите нечиј живот за 1.000 долари“, рече тој.
Со-основачот на Microsoft очекува вештачката интелигенција да го промени човештвото доста драматично. Според него, вештачката интелигенција ќе помогне да се разгледаат медицинските и научните прашања. Дополнително, посочи дека тоа ќе придонесе за зголемување на продуктивноста.
Тој го коментираше и фактот дека бил во центарот на теории на заговор за време на пандемијата на коронавирус.
„Не го очекував тоа (осврнувајќи се на тврдењата дека профитирал од коронавирусот или дека тој е виновникот за коронавирусот). За време на пандемијата, имаше десетици милиони пораки дека сум го предизвикал намерно или дека имам надзор врз луѓето. Точно е дека се занимавам со вакцини, но за да спасам животи“, истакна Гејтс.
Претпоставува дека зад завесата, како што рече, бараат Бабарога – што е преедноставено објаснување. Тој рече дека злонамерноста е многу полесно да се разбере од биологијата.
Тој повторно ги коментираше неговите врски со милијардерот Џефри Епстин кој беше осуден за трговија со деца кои биле сексуално злоставувани.
„Сега сум многу повнимателен отколку тогаш. Ќе бидам повнимателен и можеби повторно ќе згрешам. Јас сум дел од светот и не се обидувам да бидам самотник“, изјави тој.
Тој одговори и на прашањето дали е штедлив во приватниот живот.
„Немам огромен плакар. Не носам накит. Кога ја вадам украсната хартија од подарок, не ја фрлам, ја пакувам и повторно ја користам. Баба ми никогаш во нејзиниот живот не фрлила ни украсна хартија, ни парче лента за украсување подарок“, вели Гејтс.
На прашањето дали ќе најде нова партнерка по разводот од Мелинда, рече: „Се разбира, не сум робот“.
