Во Украина започна петиција за признавање нa Косово!

На веб-страницата на претседателот на Украина е регистрирана петиција со која се бара да се разгледа можноста за признавање на независноста на Косово. Иницијатор на оваа иницијатива е пратеникот Алексеј Гончаренко, јавуваат украинските медиуми.

Гончаренко на Твитер напиша дека претседателот Володимир Зеленски треба да одговори доколку петицијата собере 25.000 потписи.

„До претседателот на Украина поднесов петиција со барање за признавање на независноста на Косово. Ако петицијата собере 25.000 потписи, претседателот мора да одговори. Украина сега треба да го поддржи Косово“, напиша тој на Твитер.

Гончаренко истакна дека Меѓународниот суд на правдата во 2010 година објавил дека правото на државен суверенитет на Косово не е во спротивност со меѓународното право, не крши ниту една резолуција и меѓународни акти. Независноста на Косово сега е призната од половина од земјите-членки на ОН, вклучително и САД , како и повеќето земји ЕУ и НАТО.

„Ги знаеме овие земји. Тие земји се членки на ЕУ, НАТО или сојузници на Алијансата. Овие земји ја поддржуваат Украина во моментов, како што ги поддржуваа другите земји кога беа во неволја. Меѓу нив е и Косово. Време е да се поправи оваа грешка“, рече Гончаренко.

Тој потсети дека на 6 август во Врховниот суд ја пријавил предлог-резолуцијата број 7638 „За признавање на државниот суверенитет и независност на Косово“.

Но, сè уште не е ставено на гласање.