Вучиќ: За четирипати зголемен приливот на мигранти од Македонија

„Ние само од територијата на Северна Македонија спречивме 45.965 илегални преминувања“, истакна претседателот на Србија Александар Вучиќ на средбата со унгарската претседателка Новак.

Србија ќе ја зајакне границата кон Северна Македонија, а подоцна и кон Бугарија поради зголемениот број на илегални преминувања од овие земји кон Србија, најави српскиот претседател Александар Вучиќ. Тој ова го изјави денес, откако заедно со претседателката на Унгарија Каталин Новак ги посети привремените гранични бариери на преминот Келебија-Томпа.

Вучиќ рече дека оваа година четирипати е зголемен приливот на илегални мигранти од територијата на Северна Македонија и 3,6 пати од територијата на Бугарија.

„Ние само од територијата на Северна Македонија спречивме 45.965 илегални преминувања. Гледам дека таа бројка во Унгарија е 261.001 и презедовме уште една мерка, а тоа е поостар пристап кон вооружените криминални групи. Недалеку од тука кон Суботица, Палиќ и Хоргош, на повеќе места имавме наши безбедносни сили и вооружени пресметки, при што уапсивме повеќе од 600 од оние кои мислеа дека можат со оружје да преземаат одредени недозволени активности и да учествуваат во илегалната миграција. Верувам дека ќе продолжиме да преземаме мерки за заштита на безбедноста и сигурноста“, истакна Вучиќ.

Меѓу другото, Вучиќ ѝ се заблагодари на унгарската претседателка Новак на можноста да продолжат да разговараат и заеднички да ги решаваат проблемите.

„Благодарен сум на нашите унгарски пријатели што почнавме заедно да разговараме и да ги решаваме проблемите на неделно ниво. Презедовме два вида мерки во Србија. Почнавме да прифаќаме и укинуваме бесплатни визи за одредени земји од кои доаѓаа значителен број мигранти. Завршивме со четири земји досега за Тунис, Бурунди, Гвинеја Бисао и Индија и со усогласувањето на она што ЕУ го бара од нас. Допрва ќе преземеме мерки заедно со нашите колеги од Австрија и Унгарија“, рече Вучиќ.

TRT Balkan / агенции