Чеферин: „Случајот Негреира“ е еден од најсериозните што сум ги видел во фудбалот

Александар Чеферин се подготвува за конгресот во Лисабон што ќе се одржи следната среда, каде што ќе биде реизбран за претседател на УЕФА. Словенецот има мнозинска поддршка и ќе добе нов четири годишен мандат за периодот од 2023 до 2027 година.

Чеферин за време на конгресот ќе се занимава со „случајот Негреира“ за кој и официјално е започна истрага.

За потсетување, Барселона е обвинета дека на Хозе Марија Енрикез Негреира, поранешниот потпретседател на шпанската судиска комисија и неговата компанија од 2001 до 2018 година му платила вкупно 8,4 милиони евра. Тој, пак, наводно делегирал судии што и одговараат на Барселона и гарантирал дека тие ќе судат во полза на тимот од „Ноу Камп“.

„Не можам директно да коментирам поради две причини. Прво, затоа што имаме независна дисциплинска комисија која е одговорна за ова, и второ, затоа што јас не се занимавав детално со оваа работа“ изјави Чеферин за словенечкиот весник „Екипа“ и продолжи:

„Ситуацијата е исклучително сериозна. Толку е сериозна што според мене е една од најсериозните во фудбалот што сум ги видел“.

Тој се осврна и на Суперлигата, идеја за елитно натпреварување во кое ќе играат само најдобрите европски клубови, која за прв пат се роди пролетта 2021 година.

„Очигледно се уште се обидуваат да направат нешто, како да не разбраа дека немаме за што да преговараме. Секако, кај некои од овие луѓе и егото игра одредена улога и затоа сè уште прават нешто во таа област бидејќи со текот на годините се навикнаа сите да го одобруваат она што го прават. Но, оваа приказна е завршена, во тоа нема никаква сомнеж“.