​ООУ „Лазо Ангеловски“ во Аеродром стана првото целосно инклузивно училиште во Македонија

Со нова инвестиција во основното училиште „Лазо Ангеловски“ денеска се затвори инвестицискиот циклус и се обезбедија содржини што овозможуваат целосно инклузивна настава за учениците со попреченост. Компанијата „Кроација осигурување“ во соработка со Општина Аеродром донира средства со кои целосно се опреми сензорната соба во ова основно училиште.

На настанот присуствуваа градоначалникот Тимчо Муцунски и претседателот на Советот на Општината, Дејан Митески, хрватската амбасадорка Нивес Тигањ, претставници на компанијата и директорката на училиштето, Магдалена Петреска.

Градоначалникот Муцунски на својата фејсбук-страница истакна дека на негово задоволство со оваа донација најголемото училиште станува и целосно инклузивно, со што се олеснува пристапот до него, но и до образовниот процес во целост.

Оваа реализирана инвестиција е уште еден потврда за напорите на Општина Аеродром да овозможи еднакви услови за сите ученици, како и доказ за успешната соработка помеѓу локалната самоуправа и приватниот сектор.