Општина Брвеница одбележа 26 години од основањето
Општина Брвеница денеска по повод 26 – годишнината од основањето прв пат одржа манифестација на која беше прогласен почесен граѓанин и доделени беа признанија на граѓани за нивната работа. Дел од манифестацијата беше презентација на сработеното во текот на оваа година на локалната самоуправа преку видео отчет.
-За почесен граѓанин постхумно одлучивме да го прогласиме првиот градоначалник на Општина Брвеница Станоја Глишиќ. Тој беше основоположник на Општината. По прв пат се одлучивме да дадеме признанија и награда на 17 поединци граѓани на Општина Брвеница за нивниот придонес во развој и унапредување на општината. Се надевам дека оваа пракса ќе продолжи во иднина, изјави градоначалникот на Брвеница, Јовица Илиевски.
Меѓу наградените граѓани беа наставници, спортисти, вработени во општината, земјоделци и други. Првиот градоначалник на Брвеница Станоја Глишиќ почина во мај годинава на 75 годишна возраст. Тој ја раководеше општината по формирањето во периодот од 1996 до 2000 година.
