Последици од антируските санкции: Американски Интел се откажа од мегапроектот во Германија

Интел се откажа од плановите да отвори фабрика за чипови во Германија во првата половина на 2023 година, откако трошоците вртоглаво се зголемија

Американската корпорација Интел се откажа од своите грандиозни планови да отвори фабрика за чипови во Германија во првата половина на 2023 година.

Компанијата од Силиконската долина во март објави дека ќе отвори голем фабрички комплекс во Магдебург, кој требаше да ја намали зависноста на Европа и САД од азиските добавувачи.

Интел, објави тогаш Њујорк Тајмс, се обиде да одговори на континуираниот недостиг на полупроводници, кој првично беше поттикнат од пандемијата, која ги попречи производителите на автомобили и другите компании во Европа и САД.

Кризата во синџирот на снабдување ја истакна зависноста на клиентите од производителите на чипови во Тајван и Јужна Кореја, особено за најнапредните производи, а санкциите наметнати од Запад кон Москва поради специјалната воена операција во Украина – и нивните последици за европската економија – дополнително ja влошија ситуацијата..

Германскиот весник Фолкстајм сега објави дека компанијата сега го напуштила рокот за изградба на комплексот, наведувајќи дека водечкиот производител на полупроводници сака повеќе јавни субвенции.

Весникот наведува дека поскапувањето на енергенсите и суровините ги нарушило првичните пресметки на американската компанија. Онаму каде што Интел првично планираше трошоци од 17 милијарди евра, сега цените се поблиску до 20 милијарди евра, пренесува Ројтерс.

„Геополитичките предизвици се зголемија, а побарувачката за полупроводници се намали“, рече портпаролот на Интел, Бенџамин Бартедер. „Тоа значи дека се уште не можеме да кажеме конечен датум за почеток на изградбата.“

Компанијата додаде дека разговарала со германската влада како може да се надмине „јазот“ во финансирањето. „Се појави празнина во оваа моментална ситуација. Работиме со партнерите во владата за да го унапредиме проектот“, соопштија од Интел.

Интел на почетокот на годинава најави дека ќе изгради најмалку две фабрики за полупроводници во градот на истокот на Германија, во кои треба да се вработат околу 3.000 вработени со полно работно време, заедно со 7.000 градежни работници.

Извршниот директор на компанијата, Патрик Гелсинџер, постави за цел да го зголеми уделот на САД во глобалното производство на чипови на околу 30 проценти во следната деценија, од 12 проценти денес. Тој, исто така, рече дека сака да го зголеми уделот на Европа на околу 20 проценти од девет проценти во истиот период.