Американец вршел пренос во живо додека убивал возачка на „Убер“

Шерифот Џозеф Лопинто изјавил дека жртвата била 54-годишната Јоланда Дилон, која била пронајдена во возилото со повеќе убоди по телото. Жртвата итно била пренесена во болница, но набргу таму починала.

29-годишниот Брендон Џејкобс го извршил нападот на паркингот на Травелодџ на автопатот Вестбенк, кога возачката го оставала во хотелот околу 15 часот во четвртокот. Осомничениот изјавил дека едноставно „се разбудил и решил дека ќе убие некого“, пренесува Sky News.

Џејкобс бил уапсен неколку часа по нападот и обвинет за убиство од втор степен. За време на прес-конференцијата во петокот, шерифот потврдил дека Џејкобс го признал убиството. „Тој призна дека се разбудил вчера наутро и одлучил дека ќе убие некого, дека тоа ќе биде негов ден“, рекол шерифот.

„Беше на задното седиште. Ја избоде одзади, излегол од возилото и лежерно си заминал“, рекол шерифот. Тој додаде дека Џејкобс снимил и објавил видео од жртвата на Фејсбук. Жртвата работела и како буџетски аналитичар во полицискиот оддел во Њу Орлеанс.

„Нашиот тим ова го поднесува доста тешко. Ќе ни недостига многу. Беше многу тивка, многу скромна. Значеше многу за овој оддел и тоа ги вознемири нашите вработени“, изјавил началникот на полицискиот оддел Шон Фергусон. Полицијата соопшти дека продолжува со натамошната истрага за да се утврдат сите околности на настанот.