ММФ одобри пакет за поддршка од три милијарди долари за Египет

Тој очекува договорот со Меѓународниот монетарен фонд да привлече дополнителни 14 милијарди долари инвестиции во тешко погодената економија на Египет.

Меѓународниот монетарен фонд (ММФ) одобри договор со кој ќе се обезбеди поддршка од 3 милијарди долари на Египет во период од речиси четири години, а договорот се очекува да привлече дополнителни 14 милијарди долари инвестиции.

Соопштението на Извршниот одбор на ММФ беше објавено откако во октомври беше постигнат прелиминарен договор меѓу Египет и Фондот, пренесува Танјуг, повикувајќи се на АП.

Првичниот договор дојде неколку часа откако Централната банка на Египет воведе серија реформи, вклучувајќи приближно два отсто зголемување на клучните каматни стапки.

Голем пад на египетската фунта

Економијата на Египет е тешко погодена од пандемијата на коронавирус и војната во Украина, настани што ги загрозија глобалните пазари и ги зголемија цените на нафтата и храната низ целиот свет.

Египетската фунта загуби 36 отсто од својата вредност во однос на доларот од март.

Египет е најголемиот светски увозник на пченица, која најмногу доаѓа од Русија и Украина.

Договорот се очекува да опфати период од 46 месеци и да и даде на египетската влада непосреден пристап до 347 милиони долари, што ќе и помогне на нацијата да го зајакне платниот биланс и буџетот, соопшти ММФ.