По 50 години Здравко Чолиќ со концерт во Крива Паланка, доаѓа со голем ансамбл, бенд од 12 члена, танцова група и гудачко трио

По 50 години Здравко Чолиќ ќе има концерт во Крива Паланка. Пејачот ќе настапи на фестивалот Joy Fest, а рече дека одамна нема настапувано во Македонија, уште пред короната и дека овој пат ќе додаде енергија и магија на некои од песните.

„Во Крива Паланка сум бил во 70-тите години, на самиот почеток на кариерата. Настапував заедно со Маја Оџаклиевска и Кемал Монтено. Во тоа време работевме и патувавме многу, особено на југот на поранешна Југославија, кога ги посетивме речиси сите градови. Крива Паланка е историски град кој го паметам по прекрасниот манастир и мислам дека е дел од регионот познат по рударството“, рече Чолиќ и додаде:

„Драго ми е што работите конечно се средија и што по долго време се вративме пред македонската публика. Во нашата стандардна поп програма, која ќе ја слушне и публиката во Крива Паланка, има сплет на песни кои претставуваат вистинска музичка временска машина низ мојата педесетгодишна кариера, а судејќи според реакциите на публиката, би рекол дека секоја избрана песна го има своето заслужено место на таа листа и дека публиката е многу среќна што ја пее со нас. Доаѓаме во голем ансамбл, со бенд од 12 члена, танцова група која на свој начин ќе разубави и додаде малку енергија и магија на одредени песни, а носиме и интересно гудачко трио кое ќе претстави некои од моите песни кои вообичаено не ги изведуваме на малку поинаков начин. Сигурен сум дека не очекува посебна вечер на музика и дружење“, рече тој.

Чолиќ во моментов работи на новите песни и издавање на новиот албум.

„Ако се оди според планираното, ќе објавиме неколку песни, а потоа до пролет и целиот албум. Потоа следи концертна промоција во бројни земји и градови. Секако, Македонија е неизбежна на таа листа и верувам дека наскоро ќе се дружиме не само во Скопје, туку и во другите градови во кои секогаш со задоволство се враќам“, рече Чолиќ и на жителите на Крива Паланка им порача:

„Драги мои Паланчани, среќен сум што после многу години конечно се враќам во вашиот убав град и што заедно со песна ќе го прославиме празникот Успение на Пресвета Богородица. Ќе се погрижиме за најдобрата атмосфера, а се надевам дека ќе не послужи и убавото време и дека во Крива Паланка ќе дојде драга публика и нашите пријатели од другите градови од Македонија, Србија и Бугарија.

За потсетување, Чолиќ концертот ќе го одржи на градскиот стадион во Крива Паланка.