САД ИСПРАЌА ПАТРИОТ!? – Киев се уште нема добиено толку моќно оружје: Ќе им го загорчи животот на Русите и ќе ги поремети плановите на Владимир Владимирович Путин

„Патриот“ може потенцијално да собори руски ракети и авиони далеку од нивните цели во Украина

Администрацијата на Бајден планира да го испрати антиракетниот одбранбен систем „Патриот“ во Украина, а планот за испорака би можел да биде објавен веќе оваа недела, според двајца американски претставници и висок претставник на администрацијата, пренесува Си-Ен-Ен.

Планот на Пентагон сè уште треба да го одобри министерот за одбрана Лојд Остин пред да биде испратен до претседателот Џо Бајден за негов потпис. Тројца официјални лица изјавија за Си-Ен-Ен дека се очекува одобрување.

За потсетување, Украина ги повика САД да им испратат напреден систем за противвоздушна одбрана со долг дострел, кој е ефикасен во пресретнувањето балистички и крстаречки ракети – имено, земјата е нападната од руски ракети и беспилотни летала кои ја уништуваат клучната енергетска инфраструктура низ земјата. Тоа би бил најефективниот одбранбен систем за оружје со долг дострел испратен во земјата разорена од војна, а официјални лица велат дека ќе помогне да се обезбеди воздушниот простор за земјите на НАТО во Источна Европа.

Обука во Германија

Не е јасно колку ќе бидат испратени, но откако ќе се финализираат плановите, се очекува Патриот да бидат испорачани во наредните денови и Украинците да бидат обучени да ги користат во базата на американската армија во Графенвоер, Германија, рекоа официјални лица.

Украина го бараше овој одбранбен систем со месеци, и покрај бројните логистички предизвици и пречки, „реалноста на она што се случува на теренот“ ја натера американската администрација да ја донесе оваа одлука, изјави висок претставник на администрацијата за Си-Ен-Ен, истакнувајќи ја интензивноста на руските ракетни напади.

Сепак, батериите на системот Патриот бараат десетици обучени војници за правилно да работат со нив. Обуката за „управување“ со Патриот обично трае неколку месеци.

Системот Патриот се смета за еден од најефикасните системи за воздушна одбрана со долг дострел и потенцијално може да собори руски ракети и авиони далеку од нивните цели во Украина.

Патриот содржи мултифункционален радар кој истовремено врши надгледување на воздушниот простор, откривање и следење на цели и проектили, зрачење на цели и доставување на команди за наведување на проектили.

Има и контејнер со четири цевки кој служи за транспорт, складирање и лансирање проектили. Секој контејнер содржи по еден проектил. Секој контејнер со цевка за лансирање е посебно поврзан со системот за палење. Вкупната маса на ракетата е 1000 kg, а со контејнерот 1600 kg. Ракетата се состои од балистичка капа, систем за наведување, боева глава, погонска единица и контролен систем. Боевата глава тежи од 70 до 80 килограми.

Веќе испратен во Полска

Претходно, САД испратија ракетни батерии Патриот до сојузниците на НАТО, како што е Полска, со цел да ја зајакнат нивната одбрана, а исто така испратија и други системи ПЗО во Украина за да помогнат против руската инвазија, како што е ракетниот систем земја-воздух со среден дострел НАСМАС.

Досега, повеќе од десетина сојузници на САД, вклучувајќи ги Германија, Јапонија и Израел, исто така го купија системот.

Минатиот месец, американскиот државен секретар Антони Блинкен изјави за Си-Ен-Ен дека САД се „многу фокусирани“ на обезбедување систем за воздушна одбрана на Украина.

„Сега сме многу фокусирани на системите за противвоздушна одбрана, и не само ние, туку и многу други земји“, изјави Блинкен за Си-Ен-Ен.

„И ние работиме да ги добијат Украинците тие системи што е можно побрзо, но и што е можно поефикасно, осигурувајќи се дека тие се обучени за нив и имаат способност да ги одржуваат. Имаме многу обмислен процес што министерот за одбрана Лојд Остин го постави во Рамштајн“.