Битиќи на „Топ 100“ на СКСЗМ: Партнерски работиме за континуиран развој, нови инвестиции, работни места и подобар стандард за граѓаните

Заменик-претседателот на Владата на Република Северна Македонија задолжен за економски прашања, координација на економските ресори и инвестиции, Фатмир Битиќи, денеска се обрати на манифестацијата „ТОП 100″ на Стопанската Комора на Северо-Западна Македонија. Традиционална манифестација со која Стопанската комора на Северо-Западна Македонија секоја година ги наградува најуспешните компании кои во изминатата година оствариле позитивни резултати.

Во продолжение ви го праќаме неговото интегрално обраќање:

„Стопанската комора на Северозападна Македонија долго време беше мојот дом и оваа манифестација ме прави посебно горд бидејќи им се оддава признание на најдобрите ТОП 100 најуспешни компании членки на Стопанската комора на северо-западна Македонија.

Честопати забораваме да пофалиме и наградиме добро завршена работа, дополнително, не смееме да занемариме дека во последните три години се соочуваме со непредвидлива здравствена и економска а сега и енергетска криза која ги стави на тест нашата отпорност, истрајност и борбеност, затоа сметам дека оваа година, ова признание на „ТОП 100″ им дава дополнителна тежина.

Најдобрите ТОП 100 компании, во 2021 година имаат реализирано нето добивка од 82,3 милиони евра, оствариле 1,1 милијарда евра приходи, реализирале инвестиции од 60,5 милиони евра и вработуваат 9202 наши сограѓани.

Успехот на овие компании за мене е важен и бидејќи даваат позитивен пример и поттик за сите останати и создаваат култура на деловна мотивираност и промовираат здрава конкурентност. Сето ова влијае на подобрување на продуктивноста, зголемување на бројот на вработените, како и севкупниот економски раст.

Сакам да ја поздравам и работата на Стопанската комора на Северо-западна Македонија која ги поддржува и партнерски работи на нивниот развој. Ние не може да зборуваме за развој на нашата економија, за зголемување на конкурентноста на компаниите, за ефикасност, ако немаме компетентни, влијателни, релевантни и независни стопански комори, кои се пулсот на компаниите, кои имаат основна цел да им помогнат на компаниите во нивниот развој секако преку креирање на услови и опкружување кое ги охрабрува и поддржува во нивните планови. На Владите секогаш им се потребни силни стопански комори кои работат во интерес на целокупната бизнис заедница, а не само за неколку компании или само за издвоени пазарни сегменти. Потребни се стабилни и професионални институции кои правилно ги артикулираат барањата на компаниите и систематски и темелно предлагаат решенија за решавање на сите проблеми и надминување на сите предизвици.

Мојата визија се поклопува со суштината на постоењето на коморите. А тоа е да имаме конзистентност во економските политики, и нивно стабилно и долгорочно имплементирање врз основа на потребите на компаниите. Да креираме економски систем кој ќе биде отпорен на политички влијанија и кој нема да се менува со промени на извршната власт. Комората и во иднина треба да биде коректив на грешни политики, или пак да го потврди и поддржи она што е добро и правилно. Да биде акцелератор на добрите економски практики, да оддава признанија на економските лидери, да биде општествено одговорна институција која ќе биде симбол на правичност, рамноправност и развој но и предводник на новата македонска развојна економија која ќе биде базирана на четвртатата индустријализација, солидарност и соработка.

А ние ќе продолжиме да ве поддржуваме и партнерски да работиме за континуираното создавање подобри услови за нови работни места, нови инвестиции и подобар стандард за граѓаните.

Веќе започнаа исплатите за државна помош за компаниите по Законот за финансиска поддршка на инвестиции. Оваа година поддржуваме рекордни 417 компании, а секоја година го зголемуваме и буџетот за поддршка, оваа година ќе бидат исплатени 1,7 милијарди денари.

Со моето доаѓање на оваа позиција во 2020 година, за прв пат и покрај ковид кризата, имавме 100% исплата на државната помош и продолжуваме и оваа година, како и минатата година, што ја потврдува нашата посветеност кон нив и нашата намера да продолжиме да ги поддржуваме.

За крај, посакувам професионалност, компетентност и долговечност на оваа комора, како и на компаниите кои денеска ги славиме но и сите останати кои покажуваат пркос и развој и во овие години полни со предизвици”.

The post Битиќи на „Топ 100“ на СКСЗМ: Партнерски работиме за континуиран развој, нови инвестиции, работни места и подобар стандард за граѓаните appeared first on 24 Инфо.