Русија распореди хиперсонично оружје за кое тврди дека може да патува 27 пати побрзо од звукот: “Напаѓа како метеорит” (видео)

Хиперсонична ракета Авангард патува со брзина 27 пати поголема од брзината на звукот и може да погоди која било цел во светот за помалку од 30 минути

Русија денеска објави ново видео од својата хиперсонична ракета Авангард, која е подготвена за употреба, што британскиот „Дејли мејл“ ја толкува како уште една нуклеарна закана за Западот.

На снимката се гледа како оружјето – кое се движи кон своите цели со брзина 27 пати поголема од брзината на звукот – се спушта во подземен силос за лансирање во регионот Оренбург во југозападна Русија, во близина на границата со Казахстан.

Овој проектил, кој носи хиперсонично оружје со нуклеарна боева глава, се истрелува надвор од атмосферата на Земјата пред да слета на која било цел во светот за помалку од 30 минути. Така барем тврди Москва.

Како и со другите руски хиперсонични ракетни системи, рускиот претседател Владимир Путин тврди дека Западот нема начин да ја запре оваа ракета.

Денешното распоредување на ракетата, која се движи со брзина поголема од 32.000 км/ч, доаѓа по три последователни дена во кои Кремљ распореди ракети Јарс на нуклеарен погон во регионите Калуга и Твер.

Руските државни медиуми во четвртокот објавија видео на кое се гледа како ракетата Јарс, која може да носи нуклеарна боева глава и да достигне цели низ Европа и САД, се спушта во силос за лансирање во воздухопловната база Козелски, на околу 250 километри јужно од Москва.

Путин претходно тврдеше дека Авангард напаѓа „како метеорит“ и дека ниту еден постоечки противвоздушен систем не може да го спречи.

Тој го нарече „нов тип на стратешко оружје“, поставено за прв пат во 2019 година.

Овонеделното објавување на снимките од ракетите Јарс и Авангард дојде во пресрет на руското одбележување на Денот на стратешките ракетни сили.