Американската армија ликвидирала шест милитанти на Ал Шабаб во Сомалија

Американската армија соопшти дека убила шест припадници на терористичката милиција Ал Шабаб во денешниот воздушен напад во Сомалија.

Во соопштението на Командниот центар на американската армија одговорен за Африка се посочува дека нападот бил извршен врз цели во малото гратче Адал, во областа Среден Шабел на околу 250 километри северно од главниот град Могадишу.

Сомалиската Влада вчера соопшти дека регионот е целосно ослободен од милицијата Ал Шабаб.

Американската војска во согласност со властите во Могадишу постојано извршува напади врз цели Ал Шабаб во Сомалија, воглавно со беспилотни летала.

Сомалија е земја на Рогот на Африка, со околу 16 милиони жители која со години ја потресуваат конфликти и насилство.

Владата веќе неколку месеци спроведува воена офанзива насочена против силите на Ал Шабаб. Исламистичките екстремисти контролираат големи делови од централна Сомалија, како и јужниот дел на земјата.