Бомбардиран центарот на Керсон: Напад на југот на Украина, погодена е станбена зграда, а меѓу жртвите има и брачен пар

Најмалку четири лица загинаа, а девет се ранети во синоќешните руски напади врз јужниот украински град Керсон, изјави регионалниот гувернер.

Украинската армија во својот редовен дневен извештај објави дека пресретнала 14 од вкупно 15 беспилотни летала испратени од Русија во Украина.

Руската армија спроведува артилериски напади врз Керсон, на југот на земјата, речиси секој ден.

– Во текот на изминатата ноќ руската армија го бомбардираше центарот на градот Херсон – напиша регионалниот гувернер Олександер Прокудин во порака во Телеграм.

Тој изјави дека проектилот погодил станбена зграда каде загинале 87-годишен маж и неговата 81-годишна сопруга , а 54-годишен маж имал повреди на главата и нозете.

На друго место во центарот на Керсон, спасувачките тимови пронајдоа тело на друго лице додека ги расчистуваа урнатините.

Во последните 24 часа, најмалку четири лица загинаа, а девет беа ранети, меѓу кои и едно дете, во руските напади врз Керсон, рече Прокудин на Телеграм.

– Руската армија погоди станбени области во таа област, медицински установи, училиште и потребна инфраструктура во Херсон – рече тој.

Прокудин не даде повеќе детали за материјалната штета.

Херсон се наоѓа на другата страна на природната линија на фронтот формирана од реката Днепар и е цел на артилериски напади на руската армија речиси секојдневно откако градот беше повторно заземен од украинските сили во ноември 2022 година, по неколкумесечна руска окупација.