Хрватска без Мартиновиќ до крајот на ЕП

Хрватската ракометна репрезентација доживеа тежок удар пред продолжението на Европското првенство. Иван Мартиновиќ доживеа сериозна повреда и ќе мора да оди на операција.

Мартиновиќ, со осум гола беше најдобар поединец во историската победа на Хрватска над Шпанија од 39:29 во првото коло. Во втората рунда, во неочекуваното реми со Австрија 28:28, тој се повреди.

При резултат 21:20 за Хрватска, Мартиновиќ успеа да ја пробие австриската одбрана, при скокот врз него стартуваше еден австриски играч, тој падна и остана да лежи на теренот држејќи се за рамото.

Наместо него, во тимот, селекторот Горан Перковац, го приклучи Матео Мараш, членот на унгарска Татабања.

Во третото коло од групата Б, Хрватска во вторник од 18 часот ќе игра против најслабата селекција во групата Романија.