Портпаролката на Алексеј Навални ја потврди неговата смрт
Информацијата за неговата смрт, како што пишува портпаролката на рускиот опозиционер, Кира Јармиш, е потврдена од мајката на Навални, Људмила, која отпатувала во затворот во Сибир каде што тој ја отслужуваше затворската казна
Портпаролката на Алексеј Навални, Кира Јармиш, денеска на социјалната мрежа Икс ја потврди смртта на рускиот опозициски политичар откако вчера беше објавено дека тој починал во затворот во Сибир.
Информацијата за неговата смрт, како што пишува Јармиш, е потврдена од мајката на Навални, Људмила, која отпатувала во затворот во Сибир каде што тој ја отслужуваше затворската казна.
Во објавата на социјалните мрежи, портпаролката на Навални пишува оти тој бил убиен.
„Алексеј Навални беше убиен. Според официјалната порака добиена од мајката на Алексеј, неговата смрт настапила на 16 февруари во 14 часот и 17 минути по локално време“,
пишува портпаролката на Навални во објавата на социјалната мрежа.
Во објавата, таа дополнително пишува дека телото на Навални било однесено во Салехард, градот во близина на затворскиот комплекс, каде што руски истражители спроверуваат истрага. Упати повик телото веднаш да му биде предадено на семејството на рускиот опозиционер.
Alexey Navalny was murdered. His death occurred on February 16 at 2:17 p.m. local time, according to the official message to Alexey’s mother.
An employee of the colony said that the body of Navalny is now in Salekhard. It was picked up by investigators from the IC. Now they are…
— Кира Ярмыш (@Kira_Yarmysh) February 17, 2024
Алексеј Навални, најистакнатиот руски опозициски политичар, почина на 47-годишна возраст во затворот на крајниот север на Русија на 16 февруари. Веста за неговата смрт вчера преку соопштение ја објави затворската служба, наведувајќи дека Навални починал откако му се слошило по прошетка.
