Саудискиот суверен фонд склучи договор за партнерство со ATP
Богатиот Саудиски суверен фонд (PIF) објави договор за „повеќегодишно стратешко партнерство“ со ATP во средата, потврдувајќи го растечкото влијание ова кралство од Персискиот залив во светот на спортот.
Партнерството означува „значајна заедничка посветеност за подобрување на светскиот тенис“, наведуваат двете страни во заедничкото соопштение за печатот, без да се открие износот на договорот.
Од 2021 година, PIF инвестираше многу во неколку големи спортови, како што се фудбалот со купувањето на англискиот премиерлигаш Њукасл Јунајтед и голфот со создавањето на LIV Tour, ривал на северноамериканската PGA Tour која организира професионални турнири во голф.
Богатиот саудиски фонд ќе стане „официјален партнер на ATP“, кој сега официјално ќе се нарекува PIF ATP Rankings, и ќе биде поврзан „со ATP турнирите во Индијан Велс, Мајами, Мадрид, Пекинг и завршниот турнир и Next Gen Masters, кој ќе се организира во Џеда до 2027 година“, прецизираат PIF и ATP.
„Нашето стратешко партнерство со PIF означува одличен момент за тенисот. Тоа е заедничка посветеност да се движи иднината на спортот“, рече Масимо Калвели, извршен директор на ATP.
Минатата година, Саудиска Арабија беше домаќин на Next Gen Finals, нејзиниот прв настан во рамките на ATP Tour. Тогаш беа организирани и егзибиционите натпревари на Новак Ѓоковиќ против Карлос Алкараз и Арина Сабаленка против Онс Жабер.
Саудиска Арабија, исто така, го назначи Рафаел Надал за амбасадор на Саудиската тениска федерација на почетокот на јануари.
