Современите луѓе од градот ја губат способноста за варење хранливи билки
На западната индустриска исхрана веќе значително ѝ недостасуваат растителни влакна, според науката, и се чини дека тоа суштински го менува начинот на којшто човековите црева ја варат билната материја, посочува ново научно истражување.
Овошјето и зеленчукот отсекогаш биле клучен дел од човековата исхрана, па науката има нови сознанија за тоа како телото го разградува најзастапеното органско соединение на оваа планета – целулозата. Нов труд на меѓународен тим научници, предводени од Универзитетот „Бен Гурион“ во Бершева, Израел, открива досега непознати бактерии сместени во цревата, способни да ја разградат целулозата.
Со десетлетија се претпоставуваше дека луѓето ја разградуваат целулозата различно од тревопасните животни, како и од другите цицачи. Дури во 2003 година кај човек беше откриена бактеријата којашто ги вари билните влакна.
Врз основа на гените на таа бактерија, научниците почнаа да бараат и други слични на неа. Така, сега е откриено дека во цревата на човекот има три вида микроби коишто му припаѓаат на родот „ruminococcus“ (руминокока) и имаат гени поврзани со разградувањето на целулозата. Во фекалните примероци од луѓе кои живееле пред 1.000 и 2.000 години, овие три микроби се наоѓаат во изобилство.
Меѓутоа, во современите, индустријализирани општества, во телата на луѓето има многу помалку такви микроби.
„Овие наоди укажуваат на пад на бројот на овие бактерии во цревата кај човекот, најверојатно предизвикан од преодот кон ‘западниот начин’ на живот и исхрана“, велат авторите на научниот труд, предводени од микробиологот Сара Мораис од Израел.
Можно е, се вели, ако „руминокока“ микробите се лишени од растителни влакна – нивниот број во цревата да се намали. Научниците стравуваат дека падот на бројот на овие бактерии придонесува за полошо метаболичко здравје кај современите луѓе.
