Новинарите ја напуштија прес-конференцијата на Токсикологија – Директорката Бесија Иљази зборуваше само на албански јазик

Економската директорка на Клиниката за токсикологија – Бесија Иљази не дозволува да се вработат двајца дипломирани биолози и еден болничар, а инсистира да се вработат 18 лица на кои им истекоа договорите за дело на 31.12.2023. Меѓу нив има и прекрасни лица, но има и лица кои немаат соодветно образование за тука.

Ова денеска го изјави д-р Нико Беќаровски, раководител на Одделението за интензивна нега на Клиниката за токсикологија.
Д-р Беќаровски заедно со уште пет докторки од Стручниот колегиум на Клиниката реагираа на односот и отпорот на економската директорка Иљази, која е поставена на 14 февруари, и за која рекоа дека им е кажано оти е дипломиран економист, но немаат видено документи нити за образованието, нити за познавањето на јазици.

По прес-конференцијата на лекарите, Иљази ги повика новинарите во сала, а на прес-конференцијата таа зборуваше само на албански јазик.

Кога новинарка ја праша дали ќе се обрати на македонски, таа рече не, по што новинарите си заминаа.