Макрон: Ако Киев побара, Франција би размислила за испраќање војници во Украина
Доколку руската армија ја пробие линијата на фронтот и доколку Киев не покани, Франција би размислила за испраќање војници во Украина, изјави францускиот претседател Емануел Макрон во интервју за Економист.
„Апсолутно. Како што реков, не исклучувам ништо затоа што има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција“, рече францускиот претседател.
Според него, неговата идеја за потенцијално испраќање војници во Украина била поддржана од многу земји.
„Имам јасна стратешка задача: ако Русија победи во Украина, нема да има безбедност во Европа“, додаде тој.
Тој исто така потсети дека Париз веќе испрати војници во други земји, вклучително и неодамна во Африка, за да се борат против тероризмот.
Макрон вели дека другите западни земји не треба да ја отфрлаат оваа опција „а приори“, бидејќи летото 2022 година беа против испраќање тенкови, ракети со долг дострел и авиони, а сега сето тоа и го испорачуваат на Украина.
На 26 февруари францускиот лидер изјави дека на состанокот во Париз на кој присуствувале претставници на околу 20 западни земји, била покрената темата за потенцијално испраќање копнени трупи во Украина. Според него, учесниците не постигнале консензус за ова прашање, но ваквото сценарио не може да се исклучи во иднина.
Шефот на руската надворешна разузнавачка служба Сергеј Наришкин на 19 март изјави дека Франција веќе подготвува воен контингент кој ќе биде испратен во Украина.
