Небензја бара меѓународна истрага за случувањата во Газа
Неопходна е независна меѓународна истрага за откриените масовни гробници во Појасот Газа, изјави постојаниот претставник на Русија во ОН Василиј Небензја.
„Неодамна се појавија застрашувачки извештаи за откривање на масовни гробници во енклавата. Потребна е независна меѓународна истрага за да се изведат сторителите пред лицето на правдата“, рече Небензја на седницата на Генералното собрание посветена на ветото на САД за нацрт-резолуцијата на Советот за безбедност на ОН за прием на Палестина за полноправна членка на оваа светска организација.
Рускиот дипломат посочи и дека Израел е заинтересиран само за воено решение на палестинското прашање.
„Во светло на плановите на Западен Ерусалим да го нападне Рафах, јасно е дека Израел е заинтересиран само за воено решение на палестинското прашање, дури и по цена на животите на преостанатите заложници“, рече Небензја.
А нашите американски колеги, за жал, отворено им помагаат во тоа“, додаде Небензја.
Претходно, генералниот секретар на ОН Антонио Гутереш побара итно да им се дозволи на меѓународните истражители да ги истражат масовните гробници откриени во Појасот Газа, со цел да се утврдат околностите за смртта на стотици Палестинци.
