ОН побараа мислење од Меѓународниот суд на правдата за израелската окупација

Резолуцијата беше усвоена синоќа со 87 гласа за, 26 против, од кои 53 воздржани.

Израел, САД и уште 24 земји, меѓу кои Велика Британија и Германија, гласаа против резолуцијата, Русија и Кина беа „за“, а Франција е меѓу 53-те земји кои се воздржаа.

МСП во Хаг, познат и како Светски суд, се занимава со спорови меѓу државите. Одлуките на тој суд се обврзувачки, но тој нема моќ да наметне спроведување.

Палестинските лидери денеска го поздравија исходот од гласањето, а високиот функционер Хусеин ал Шеик рече дека тоа „ја одразува победа на палестинската дипломатија“.

Портпаролот на палестинскиот претседател Махмуд Абас, Набил Абу Рудајне, рече дека е дојдено време Израел да биде држава која ги почитува законите и да биде одговорна „за продолжување на злосторствата против палестинскиот народ“.

Генералното собрание на ОН побара од МСП советодавно мислење за правните последици од „окупацијата, населувањето и анексијата, вклучително и мерките насочени кон промена на демографскиот состав, карактерот и статусот на Светиот град Ерусалим“.

Исто така се бара мислење и како таквата политика и пракса влијае на правниот статус на окупацијата и какви се последиците од тој статус за сите земји и ОН.

МСП претходно издаде мислење за израелската окупација во 2004 година, кога беше оценето дека е незаконска разделната ограда што Израел ја поставува кон Западниот Брег. Израел го отфрли тоа мислење и го нарече политички мотивирано.

Израел ги освои Западниот Брег, Појасот Газа и Источен Ерусалим во војната во 1967 година. Палестинците планираат да основаат независна држава на тие територии.

Амбасадорот на Израел во ОН Гилад Ердан изјави дека ниту едно меѓународно тело не може да одлучи дека еврејскиот народ е окупатор во сопствената татковина, оценувајќи дека „секоја одлука на судот што ќе добие мандат од морално банкротираните и политизирани ОН е целосно нелегитимна“.