Запушеност и болка во увото после капење – како да се заштитиме од инфекции?

Во текот на летото лекарите советуваат да се внимава во базените, езерата и морињата поради честите инфекции на увото предизвикани од бактерии и габи, особено кај децата.

Проф. Д-р Сања Крејовиќ, фонијатар и отоларинголог, за РТС изјави дека треба да се внимава на хигиената на ушите и грлото и посочи дека „може да се појават и невидливи повреди на увото, како што е пукање на тапанчето при скокање во базенот“.

Откако ќе се оладиме во базен, река, езеро или море, се случува увото да ни се блокира, да почувствуваме благ притисок во него и нарушен слух, а подоцна и болка.

Ова се првите симптоми на таканареченото „пливачко уво“, кои нема да исчезнат без соодветен третман, па затоа е неопходно веднаш да се контактира специјалист за уво, грло и нос.

Проф. Д-р Сања Крејовиќ за РТС изјави дека респираторните инфекции се актуелни и во лето, но и во зима, бидејќи се разладуваме на различни начини, како што се капење во базени и поминување време во климатизирани простории.

„Без разлика на чистотата и исправноста на водата, инфекција може да дојде и во приватните базени кои не ги користат многу луѓе. Треба да се грижите за хигиената, увото, носот и грлото“, посочува докторката.

Симптоми на пукнато тапанче

Според неа, при капење во базени може да се појават не само видливи повреди на носот, туку и на ушите, кои понекогаш знаат да бидат незабележливи.

„Кога скокаме во водата, доаѓа до ненадејна промена на притисокот, исто како кога летаме во авион. Може да дојде до руптура на ушното тапанче, што е многу сериозна повреда и како таква треба да се сфати и третира бидејќи тоа е пат на пренесување на инфекцијата до централниот нервен систем“, вели Крејовиќ.

Таа забележува дека симптомите на пукнато тапанче се акутна болка, зуење во ушите и исцедок, кои треба соодветно да се третираат со антибиотици.

Додава дека во текот на летните месеци се почести инфекциите на надворешното уво кога навлегуваат бактерии или габи при капење, како и инфекции на синусите, крајниците и грлото.

Советува и децата и постарите да ги исплакнат носот и грлото со стерилизирана морска вода, нагласувајќи ја исклучителната важност на превентивните мерки.