Ладен туш за Роналдо и Ал Наср! Кристијано мора да го чека своето деби во Саудиска Арабија!

На португалската суперѕвезда му е забрането веднаш да истрча на теренот во дресот на својот нов клуб

Бајката на Кристијано Роналдо и Ал Наср штотуку започна, но веќе го доживеа првиот пресврт. Португалската суперѕвезда во вторникот беше претставена на спектакуларен начин во Саудиска Арабија, но само ден подоцна стигнаа првите лоши вести.

Како што пренесува „Дејл мејл“, еден од најдобрите фудбалери на сите времиња ќе мора да го почека своето деби во дресот на новиот клуб, бидејќи треба да „одлежи“ уште два натпревари од суспензијата што ја заработи додека настапуваше во Манчестер. Јунајтед. Да потсетиме, Кристијано беше санкциониран пред неколку месеци бидејќи удрил во телефонот на едно од момчињата на трибините на пат кон соблекувалната.

Навивачите на Ал Наср се надеваа дека ќе можат да уживаат во мајсторијата на капитенот на португалската репрезентација. Фудбалерот кој во Саудиска Арабија ќе заработува 200 милиони евра по сезона требаше да биде на теренот веќе во четврток, но со оглед на тоа што казната од Островот е префрлена во новиот клуб, Роналдо треба да го одигра првиот меч во жолто-сините дрес на 21 јануари против Ал Итифак.