Според новите правила, менаџментот на Телеграм може да ги открие IP адресите и телефонските броеви на оние кои ги прекршуваат правилата кога добива законски барања од властите, вели основачот на мрежата, Павел Дуров.


„Јасно ставивме до знаење дека IP адресите и телефонските броеви на оние кои ги прекршуваат нашите правила може да им бидат откриени на надлежните органи како одговор на разумни законски барања“, напиша Дуров на својот канал на Телеграм.

Основачот на оваа платформа рече дека Условите за користење и Политиката за приватност сега ќе бидат униформни за сите корисници, без разлика на географската локација.

Дуров нагласи дека ваквите ажурирања се воведуваат за „понатамошно одвраќање на криминалците од користење на Telegram како платформа за нелегални активности“.

На крајот на август, основачот на Телеграм беше обвинет во Франција дека не се спротивставува на ширењето на криминална содржина преку платформата.

Дуров подоцна беше пуштен од притвор со кауција од пет милиони евра, со строг судски надзор и обврска двапати неделно да се јавува во полициска станица. Нему му беше забрането да ја напушти француската територија.