Физиотерапевт од Струга после 19 години остана без работа, новиот директор без никакво образложение го раскинал договорот !!!!

Стружанец, 19 години договорец, остана без работа. Димче Димоски дипломирал, бил стипендист на државата, како дефицитарен кадар во 2005-та година. Речиси една деценија со договор на дело, работел во Специјализираната болница за ортопедија и трауматологија, неколку години работел приватно, а последните две бил ангажиран во Специјалната болница за нефрологија.

Новиот директор пред еден месец, без никакво објаснување му го раскинал договорот.

„Барам објаснување од министерот за здравство зошто ми е прекинат договорот бидејќи од директорот не добив никакво објаснување, ниту писмено, ниту усно зошто ми е прекинат договорот за дело, а на мое место се вработуваат исто така со договор на дело тројца нови колеги“, вели Димче Димоски.

Во време на недостаток на квалитетен стручен медицински кадар, наместо да се стимулираат професионалците, тие се бркаат од работа. Колегите од болницата сведочат дека на местото на еден професионалец се донесени тројца некомпетентни, дел од нив не го познаваат македонскиот јазик.

„Ние имавме навистина еден квалитетен стручњак човек којшто навистина ја познава својата професија до максимум, човек на којшто можеш да се потпреш во секој момент. На негово место ни се донесоа нови три лица кои не се едуцирани, не се компетентни“, изјави д-р Елизабета Димоска Чифлигароска од Специјалната болница за нефрологија.

Димоски е родител на две малолетни деца, бара од надлежните решавање на работниот статус. Директорот на Специјалната болница за нефрологија, д-р Јетмир Зиба, за случувањата најави став од следната недела.

Соња Рилковска