Месечните трошоци пониски за 57 денари, министерот Дурмиши е уверен – со ограничените маржи граѓаните заштедиле.
Месечните трошоци паднаа за само 57 денари, кај храната и пијалоците се намалени за нешто над 900 денари, но и покрај ваквите скромни бројки министерот Дурмиши е уверен дека мерката со која се ограничија маржите дала резултати граѓаните заштедиле.
„Ние донесовме две мерки. Донесовме одлука за училишниот прибор и за потрошувачка кошничка. Ако ги преземеме анализите од двете мерки имаме намалување на трошоците од 3.000 денари кај секое семејство“, вели министерот за економија и труд, Бесар Дурмиши.
Но, ова мислење не го делат и синдикатите. Бараат при креирање на вакви мерки и тие да бидат вклучени.
„За жал трговците го искористија периодот кога се креираше ваква мерка и што направија прво ги зголемија цените и синдикалната минимална кошничка во делот кај храната и пијалаците беше зголемена за околу 750 денари, а сега за октомври намалена за 960 денари, што ќе каже дека трговците беа алчни на грбот на работниците повторно се обидуваат да заработуваат и со зголемените цени кои ги намалија во октомври повторно останаа со истиот профит кој го имаа. За жал во Македонија може да гледаме само за алчноста на трговците“, вели претседателот на ССМ Слободан Трендафилов.
Претходно и министерката Кочоска рече дека мерката е преобемна, институциите немаат капацитет да прават проверки и смета дека во иднина повеќе не треба да се применува. Граѓаните пак секојдневно во анкетите зборуваат како не почувствувале значајно поевтинување. Но, и покрај ваквите реакции Дурмиши најави слична кошничка за време на празници.
Мерката трае до крајот на месецов. Но, досегашната пракса покажа дека кога завршуваат ваквите одлуки, цените повторно одат нагоре. Дурмиши вети ако тоа се случи ќе се преземат поригорозни мерки, но не откри какви.
Идната недела пак на седница на Влада треба да се најде буџетот за следната година. Синдикатите добиле ветување дека пред да биде доставена финалната верзија ќе се одржи економско социјален совет на кој ССМ заедно со Владата и работодавачите ќе ги разгледуваат ставките за платите во буџетот.
Според, последните податоци на ССМ на едно четиричлено семејство за да ги покрие основните трошоци во месецот му се потребни 1.000 евра, ако се вклучат и оние за кирија за стан се нешто повеќе од 1.200 евра.
Телма Тв
