(Видео) Незапирливиот Дончиќ го предводеше Далас до победа, славеа и Детроит и Атланта

Кошаркарите на Далас Маверикс ја постигнаа четвртата победа во новата сезона во НБА. Ноќта од недела кон понеделник тие пред своите навивачи ги победија Орландо Меџик со 108:85.

Клучни за победата на Далас се покажаа минутите од крајот на првата четвртина до крајот на втората, кога домашните од 17:20 стигнаа до 60:31, а во тој период блескаше Лука Дончиќ.

Словенецот во првото полувреме постигна 25 поени, а до крајот на натпреварот имаше 32 поени, девет скока и седум асистенции. Даниел Гафорд додаде 18 поени со осум скока, а Кајри Ирвинг постигна 17 поени.

Орландо играше без својот најдобар играч Паоло Банкеро, а најдобар играч беше Франц Вагнер со 13 поени, шест скока и шест асистенции.

Детроит Пистонс ја забележаа втората победа сезонава откако го совладаа Бруклин Нетс со 106:92. Секој играч од првата петорка на Детроит постигна двоцифрен број поени, додека Малик Бисли додаде 18 од клупата за резерви, Кејд Канингем беше водечки стрелец на победничката екипа со 19 поени, а додаде и пет асистенции и шест скока.

Најдобар играч на Бруклин беше Камерон Џонсон со 26 поени.

Атланта Хокс одигра одлично второ полувреме, во кое постигна 17 поени повеќе противникот. Хокс на гостински терен го победи Њу Орлеанс Пеликанс со 126:111.

Одлична партија кај Атланта имаше Џејлен Џонсон, кој постигна 29 поени и имаше осум асистенции и девет скока. Треј Јанг постигна 23 поени и 12 асистенции.