Нејмар: Би било интересно повторно да играм заедно со Меси и Суарез

Фудбалерот на Ал Хилал Нејмар изјави дека е задоволен од тоа како се одвива неговата кариера и истакна дека е среќен во Саудиска Арабија.

Нејмар пристигна во Ал Хилал во 2023 година од Пари Сен Жермен. За клубот од Ријад одигра само седум натпревари поради проблеми со повредите.

Нејмар не ја отфрли можноста повторно да заигра со Лионел Меси и Луис Суарез, кои сега се членови на Интер Мајами. Бразилецот во Барселона играше со Меси и Суарез.

„Би било неверојатно повторно да играм со Меси и Суарез. Тие се мои пријатели, сè уште сме во контакт. Би било интересно да се ‘оживее’ тоа трио. Среќен сум во Ал Хилал, среќен сум во Саудиска Арабија, но кој знае фудбалот е полн со изненадувања“, изјави Нејмар.

„Кога се појави веста дека заминувам од ПСЖ, преодниот рок во САД беше затворен, па ја немав таа опција. Проектот што ми беше понуден во Саудиска Арабија беше многу добар, не само за мене, туку и за моето семејство. Значи трансферот во Саудиска Арабија беше најдобрата опција“, додаде бразилскиот фудбалер.

Нејмар за бразилската репрезентација одигра 128 натпревари и постигна 79 голови.