Чудо во Авганистан: Тројца рудари преживеале 60 часа под земја без храна и вода

Тројца рудари заробени по лизгање на земјиште во рудник за злато во североисточната авганистанска провинција Бадахсан се спасени, соопштија локалните власти.

Рударите поминале повеќе од 60 часа без храна и вода под земја во областа Јаван пред да бидат спасени од локалното население и властите.

Тие ископале тунел за да извлечат злато, но тој се урнал неколку часа пред земјотрес да го погоди регионот.

Спасените рудари беа пренесени со воен хеликоптер во болница во главниот град.

Локалните власти велат дека спасувачката мисија била тешка бидејќи се работело за планинско подрачје со лоши патишта, а имало и недостиг на соодветна опрема.

Во провинцијата Бадахсан има рудници за злато кои локалното население незаконски и непрофесионално ги експлоатира за нивните секојдневни потреби.